රුදුරු කොටි ත්රස්තවාදය පරාජය කර මවුබිම එක්සේසත් කරලීමේ මානුෂීය මෙහෙයුමට දායක වූ අභීත හෙළ විරුවෝ “නැඟෙනහිර මානුෂීය මෙහෙයුම් පදක්කම, “උතුරු මානුෂීය මෙහෙයුම් පදක්කම” සහ සන්ධාරවලින් පිදුම් ලබති.දිවි පරදුවට තබා දේශය වෙනුවෙන් කළ විශිෂ්ට මෙහෙවර අගයා සේනාධිනායක , ජනාධිපති මහින්ද රාජපක්ෂ මහතාගේ අතින් ඊයේ (14) පිරිනැමුණු පදක්කම්වලින් රණවිරුවන්ගේ නිල කබා හැඩ විණි.
නැඟෙනහිර මානුෂීය මෙහෙයුමට දායක වූ යුද , ගුවන්, නාවික , පොලිස් විරුවන් සහ වෙනත් අය 197776 දෙනෙක් “නැඟෙනහිර මානුෂීය මෙහෙයුම් පදක්කමෙන්” පිදුම් ලැබූ අතර මෙහෙයුමට ප්රායෝගිකව එක් වූ 42260 දෙනෙක් සන්ධාරයෙන්ද පිදුම් ලැබූහ.
උතුරු මානුෂීය මෙහෙයුමට දායක වූ යුද, ගුවන්, නාවික , පොලිස් විරුවන් සහ වෙනත් අය 282830 දෙනෙක් සහ මෙහෙයුමට ප්රායෝගිකව එක් වූ 130891 දෙනෙක් ද එම සන්ධාරයෙන් ද පිදුම් ලැබූහ. ශ්රී ලංකා යුද හමුදාව, ගුවන් හමුදාව, නාවික හමුදාව , පොලිසිය සහ වෙනත් පුද්ගලයන් වෙත මේ පදක්කම් සහ සන්ධාර පැළැඳවීමේ අභිමානවත් උළෙල ජනාධිපතිවරයාගේ ප්රධානත්වයෙන් අරලියගහ මන්දිරයේදී ඊයේ පැවැත්විණි.
නැගෙනහිර සහ උතුරු පළාත් ත්රස්තවාදයෙන් මුදා ගැනීමේ මානුෂීය මෙහෙයුම්වලදී එක් වූ යුද, ගුවන්, නාවික හමුදා සහ පොලීසියේ ස්ථිර සහ ස්වේච්ඡා බල සේනාවන්හි සියලු නිල දරන්නන් සහ වෙනත් අයට විශේෂ පදක්කමක් පිරිනැමිය යුතු බවට සේනාධිනායකයා ලෙසින් ජනාධිපති මහින්ද රාජපක්ෂ මහතා ගත් තීරණයක් අනුව මේ පදක්කම් පිරිනැමිණි.
ජනාධිපතිවරයා වෙනුවෙන් ජනාධිපති ලේකම් ලලිත් වීරතුංග මහතාගේ අස්සනින් යුක්තව 2010 ජනවාරි මස 05 වන දින නිකුත් කරන ලද අංක 1635/16 දරන අතිවිශේෂ ගැසට් පත්රය ප්රකාරව මේ පදක්කම් නම් කර ඇත. රාජ්ය ලාංඡනය සහ මාවිල් ආරු සොරොව්ව එක් පසෙක නිරූපිත “නැඟෙනහිර මානුෂීය මෙහෙයුම් පදක්කමේ” මානුෂිකත්වය යන පාඨය සිංහලෙන් දක්වා ඇත.
එහි අනෙක් පස යුද , ගුවන්, නාවික හමුදාවන්හි ලාංඡන සමඟ ‘මානුෂිකත්වය’ යන සිංහල පාඨය දක්වා තිබේ. නැඟෙනහිර පළාත් ධජයේ වර්ණයෙන් හා ඒ ඒ සන්නද්ධ සේවයේ වර්ණයෙන් යුතු පීත්ත පටියකින් යුත් මේ පදක්කම පිරිනැමෙන්නේ 2006 - 07 - 28 දින සිට 2007 - 07 - 10 දින දක්වා වූ නැගෙනහිර මානුෂීය මෙහෙයුමට දායක වූවන්ටය.මෙහෙයුමට ප්රායෝගිකව දායක වූවෝ සන්ධාරවලින් පිදුම් ලැබූහ.
දේශ පුත්ර සම්මානයට ඉක්බිතිව පැළඳවෙන මේ පදක්කම හෝ සන්ධාරය අවලංගු කිරීම සහ නැවත ලබා දීමේ බලතල සේනාධිනායකයා ලෙසින් ජනාධිපතිවරයා සතු වේ. 2007 පෙබරවාරි මස 26 දින සිට 2009 මැයි මස 18 වැනි දින දක්වා ක්රියාත්මක කෙරුණු උතුරු පළාත මුදා ගැනීමේ මානුෂීය මෙහෙවරට දායක වූ යුද, ගුවන්, නාවික පොලිස් සියලු නිල දරන්නෝ සහ වෙනත් අය “උතුරු මානුෂීය මෙහෙයුම් පදක්කම” සන්ධාරයට හිමිකම් කියති.
ශ්රී ලංකාවේ කටු සිතියමක් සහ රාජ්ය ලාංඡනය එක් පසෙකත් යුද, ගුවන්, නාවික ලාංඡන අනෙක් පසෙත් සඳහන් කොට ඇති මේ පදක්කමේ “අභිමානය” යන්න සිංහලෙන් සටහන් කොට තිබේ. ජනාධිපති මහින්ද රාජපක්ෂ මහතාගේ සම්ප්රාප්තියත් සමඟ උදෑසන 10.40 ට මේ අභිමානවත් උළෙල ඇරැඹිණි.
මාතෘභූමිය වෙනුවෙන් දිවි පුද කළ අභීත රණවිරුවන් සිහිපත් කිරීමෙන් අනතුරුව නැඟෙනහිර මානුෂීය මෙහෙයුම් පදක්කම පිළිබඳ ගැසට් පත්රය ශ්රී ලංකා යුද හමුදාවේ ලුතිනන් කර්නල් එම්.ඒ.ඒ.ජේ.කුලරත්න ප්රකාශයට පත් කෙළේ ය. උතුරු මානුෂීය මෙහෙයුම් පදක්කම පිළිබඳ ගැසට් පත්රය නාවික හමුදාවේ කපිතාන් එම්.එම්.ආර්. ඒ.සෙනරත් ප්රකාශයට පත් කිරීමෙන් ඉක්බිතිව පදක්කම් ප්රදානය ඇරැඹිණි.
ආරක්ෂක මාණ්ඩලික ප්රධානී, ශ්රී ලංකා ගුවන් හමුදාපති එයාර් චීෆ් මාෂල් රොෂාන් ගුණතිලක මහතා වෙත ජනාධිපති මහින්ද රාජපක්ෂ මහතාගේ අතින් ප්රථම “නැඟෙනහිර මානුෂීය මෙහෙයුම් පදක්කම “ පැළඳවිණි. යුද හමුදාපති ලුතිනන් ජෙනරාල් ජගත් ජයසූරිය, නාවික හමුදාපති වයිස් අද්මිරාල් තිසර සමරසිංහ, පොලිස්පති මහින්ද බාලසූරිය මහත්වරු වෙත අනතුරුව පදක්කම් පැළඳවිණි.
සංකේතාත්මක පදක්කම් පැළඳවීම අරඹමින් ශ්රී ලංකා යුද හමුදාවේ මේජර් ජෙනරාල් දයා රත්නායක, මේජර් ජෙනරාල් චාගී ගාල්ලගේ, බ්රිගේඩියර් එස්.ටී.ටී. ලියනගේ, කර්නල් එස්.ඒ.ඒ. ඩී. ගුණවර්ධන වෙත පදක්කම් පළඳවන ලදී. අනතුරුව යුද හමුදාව වෙත උතුරු මානුෂීය මෙහෙයුම් පදක්කම් පිරිනැමිණ.
ශ්රී ලංකා නාවික හමුදාවේ රියර් අද්මිරාල් ඩී.ඩබ්ලිව්.ඊ.එස්.දිසානායක, රියර් අද්මිරාල් එස්.එම්.බී. වීරසේකර, රියර් අද්මිරාල් යූ.එස්.කේ.කොළඹගේ ඇතුළු නිලධාරින් හා සෙසු නිලයෝද ශ්රී ලංකා ගුවන් හමුදාවේ එයාර් වයිස් මාෂල් පී.පී.බී.ප්රේමචන්ද්ර, එච්.ඩී. අබේවික්රම ඇතුළු නිලධාරිහු සහ සෙසු නිලයන් ජනාධිපතිවරයා අතින් පදක්කම් පළඳවා ගත්හ.
ශ්රී ලංකා පොලීසියේ ජ්යෙෂ්ඨ නියෝජ්ය පොලිස්පති එච්.ඒ.ඩී.ගුණතිලක , ජ්යෙෂ්ඨ පොලිස් අධිකාරී ඩන්කන් පෝල් මහත්වරුන්ටද නැඟෙනහිර මානුෂීය මෙහෙයුම් පදක්කම් පිරිනැමුණු අතර ඊට සමගාමීව ඒ ඒ හමුදාවලට උතුරු මානුෂීය මෙහෙයුම් පදක්කම් පැළැඳවිණි.
අනතුරුව අගමැති දි.මු. ජයරත්න මහතා පදක්කම් පැළැඳවීමට එක් විය. ජනාධිපති ලේකම් ලලිත් වීරතුංග, ආරක්ෂක ලේකම් ගෝඨාභය රාජපක්ෂ මහත්වරු ත්රිවිධ හමුදාපතිවරු සහ පොලිස්පතිවරයා උතුරු සහ නැඟෙනහිර මානුෂීය මෙහෙයුම් පදක්කම් ප්රදානයට එක් වූ මේ අභිමානවත් උළෙල ජාතික ගීය ගායනා කරමින් අවසන් කෙරිණි.මැති ඇමැතිවරු ඇතුළු පිරිසක් මේ අවස්ථාවට එක් වූහ.
